تجربة الدراسة في ألمانيا لطالبين جزائريين وكل المعلومات والخطوات التي مروا عليها وبعض النصائح Study in Germany
في هذا المقال نشارككم تجربتين لطالبيين جزائريين يدرسون في ألمانيا كتبوا لكم تجربتهم وكل المعلومات والخطوات التي مروا عليها ونصائهم لكل من يود الدراسة في ألمانيا.
تجربة الدراسة في الجامعة التطبيقية الألمانية Hochshule Magdeburg-stendal لطالب جزائري
السلام عليكم
بالنسبة للتخصص تاعي لي حكيت عليه
Sustainabile Resources, Engineering and Management ( StReaM)
التخصص هو تخصص باشيلور يعني ليسانس
هاذا العام هو أول عام يدرس فيه التخصص، الجامعة و بعد تعاون بين الإداريين و الأساتذة قررو هذا التخصص لي راهو ممول كذلك من مقاطعة ساكسوني أنهالت. منذ أيام تحدث مع الشخص لي مسؤول على هذا البرنامج الدراسي program coordinator، و سألت بخصوص إذا رايح يفتحو تسجيلات قريبا من أجل الفصل الصيفي المقبل بحكم هذا التخصص بداية تاعو في فصل صيفي، دراسة تبدأ في بداية أفريل، و الجواب كان نعم. و لهذا حبيت نقولكم شروط التسجيل في هذا التخصص سهلة، كل واش تحتاجو هو شهادة مستوى لغة إنجليزية مثلا أيلتس 5,5 يكفي، تحتاج سيرة ذاتية، يكون عندك باك زائد على الأقل عام دراسة في جامعة جزائرية في تخصص علمي أو ليسانس في أي تخصص المهم الباك تاعك يكون علمي، الشهادات و كشوف النقاط تكون مصادقة و مترجمة للغة الإنجليزية، إذا عندك كذلك خبرة تاع عمل أو تدريب أو رسائل توصية بالإمكان إضافتها، التسجيل يفتح في منتصف أكتوبر و يكون عبر موقع Uni-assist ، لي راهي مسؤولة على البرنامج قاتلي ممكن جدا يبداو يرسلو القبولات في بداية ديسمبر إذا سجلت مع بداية فتح التسجيلات، كذلك القبول ميخدوش بعين الإعتبار نقاط تاعك يعني حتى بمعدل 10 ممكن نتحصل على قبول، الجامعة هي Hochshule Magdeburg-stendal
الأمور الجيدة أنو تعامل الإدارة أكثر من رائع، الأساتذة مشاء الله، موقع الجامعة ممتاز، كلشي متوفر، مدينة ماغديبورغ ليست غالية في المعيشة و تتوسط مدن كبرى كبرلين و هانوفر، رسوم الفصل هي 130 أورو و تتحصل على بطاقة مواصلات تركب باطل، كاين نشاطات كثيرة في الجامعة، و التخصص هذا عندو مستقبل كبير، أمر آخر جيد هو أنو شركة Intel الأمريكية رايح تفتح مقر كبير هنا في ماغديبورغ في 2027 إن شاء الله و رايح يوظفو 7000 شخص، كذلك كاين إستثمارات كبيرة في مجالات أخرى في ساكسوني أنهالت، الأمر الآخر الجيد هو تواجد جزائري يدرس هذا تخصص، يعني بإذن الله إذا كاين جزائريين نجحو في الوصول هنا أنا رايح نوقف معاهم و نعاونهم، المسؤولة عن البرنامج أيضا متحمسة باه تشوف جزائريين يدرسو هذا التخصص العام المقبل، حاليا رانا 25 طالب فقط، بالنسبة لجنسيات الطلبة كاين من إيطاليا، بنغلاديش، مصر، بلغاريا، روسيا، كولومبيا، ميانمار، ماليزيا، إيران، باكستان، الهند، اليابان، كينيا، سريلانكا، فرنسا، ألمانيا، أكبر عدد من الطلبة عندنا من النيبال كاين أربعة. صحيح العقبة الوحيدة هي الحساب البنكي المغلق أو الكفيل، أنا مثلا لقيت كفيل و راني نعاني شوية مع المصاريف و لكن الحمد لله، ديما نشوفو للمستقبل، إن شاء الله الأمور تتحسن.
أي شخص حاب يسجل في هذا التخصص يبدأ الإجراءات من الآن خاصة موعد الفيزا.
بالتوفيق.
تجربة طالب جزائري مع واحد من بين أفضل التخصصات المتاحة حاليا في الجامعات الألمانية وهو يدرس الآن فيه
السلام عليكم
بالنسبة للأسئلة حول تخصص تاعي، رايح نحكي عليه و نحاول نشرحو، السبب لي خلاني ممديتش إسم تخصص لأنو التخصص نفسو يجمع بين 3 تخصصات، و كثيرا ما واجهت شوية صعوبات أني نتحدث عليه مع أصدقاء أو أفراد العائلة، كاين كذلك موقف طريف واجهتو لما وصلت لمطار فرانكفورت و سألني ضابط الحدود واش رايح نقرى و قالي أحكيلي بإختصار على التخصص تاعك، المهم لما حكيتلو كان مهتم بزاف بيه.
التخصص تاعي هو : موارد مستدامة، هندسة و إدارة، Sustainabile Resources, Engineering and Management، و الإختصار تاعو هو StReam. في الجامعة لي ندرس فيها حاليا يقولنا Steam students.
التخصص هذا هو تخصص باشيلور و الشهادة المتحصل عليها هي bachelor in engineering، و هاذي نقطة أخرى جيدة في التخصص نفسو يعني تتخرج كمهندس و ليس بشهادة باشيلور فقط. الآن بالنسبة للتخصص فهو يغطي مجالات عديدة مع التركيز على الإستدامة لي حاليا ألمانيا و دول أروبية راهي بدات تتبناها. المجالات لي رانا ندرسو فيها و رايح ندرسوها في الفصول القادمة هي الأنظمة البيئية، الطاقات المتجددة، إقتصاد ، السياسات المالية، التحول نحو الإستدامة، التصميم الصناعي، الإدارة، المحاسبة، قانون تجارة دولية. مدة دراسة هي 7 فصول يعني تلاث سنوات و نصف، مع القيام بتدريب خلال الفصل 6، أما الفصل 7 فهناك إمكانية للدراسة في بلد آخر أو القيام بتدريب، ثم التحضير bachelor thesis. لغة التدريس هي الإنجليزية. مواد أخرى لي ندرسوها هي الرياضيات، إعلام آلي، كيمياء، فيزياء، لغة ألمانية حيث مع الفصل السادس لازم تصل مستوى مليح في ألمانية من أجل التدريب. في النهاية هذا التخصص عندو مستقبل كبير في ألمانيا و كاين فيه كذلك فرص شغل، مثلا أي شركات خارج ألمانيا حابة تستثمر او تفتح فروع في ألمانيا لازم تبين أنها تحترم معايير الإستدامة و حتى الشركات لي في ألمانيا حاليا بدات تفرض عليها تحترم معايير الإستدامة، وهذا المجال صراحة واسع بزاف و ماش راح يكفي باه نحكي عليه في شوية أسطر.
في الأخير و للأسف كاين بعض أشخاص أخدو صور تاعي من الفايسبوك و كذلك عملو سكرين شوت على البروفايل تاعي و راهم يقومو بأمور مخجلة و هاجموني و راهم يحاولو ينشرو أمور غير صحيحة عليا، أنا نقولهم ربي يهديهم علاه الكره هاذا كامل، و صراحة أنا الأمنية تاعي نشوف أكبر عدد من الطلبة الجزائريين في ألمانيا، و الهدف تاعي هو المساعدة و التشجيع، نتمنى الطلبة الجزائريين لي راهم في ألمانيا حاليا يحكيو كذلك التجربة تاعهم و يعاونو. لاحظت كذلك أنو كاين أشخاص عندهم إمكانيات باه يدرسو في ألمانيا ولكن بسبب المعلومات الخاطئة توقفو. مثلا معلومة أنو لازمك معدل باك فوق 13 باه تدرس في ألمانيا مكانش منها راهي معلومة غالطة، ممكن حتى ب10 تقرى في ألمانيا حتى تخصص ماستر، كذلك تقدر تقرى بالإنجليزية و السفارة متطلبش منك مستوى في لغة ألمانية، مرة أخرى الجامعات الجزائرية معترف بها في ألمانيا حسب موقع بيانات أنابين.
أي أسئلة تفضلوا.