الدراسة في ألمانيا للجزائريين : تجربة طالبة مع تأشيرة الدراسة الجامعية الألمانية
Studieren in Deutschland für Algerier: Studienerfahrung mit einem deutschen Studienvisum
Studying in Germany for Algerians: Student Experience with a German University Study Visa
نشارككم في هذا المقال تجربة طالبة جزائرية ورحلتها مع تأشيرة الدراسة الجامعية الألمانية وتحقيق حلمها للدراسة في ألمانيا..
التجربة كاملة:
السلام عليكم حبيت نحكي تجربتي مع الفيزا الدراسية لالمانيا :
اولا نعرف بنفسي انا فتاة عندي ليسانس لغة انجليزية عام 2014 و خدمت في مدارس خاصة كمعلمة لغة انجليزية ثم بدلت مجال و خدمت كمترجمة و مراقبة وثائق في شركة اجنبية .. و منذ ثلاث سنوات اي في عز الكورونا هههه بدات فكرة الهجرة دور في راسي و اخترت المانيا لانو رحت ليها كسياحة و عجبتني البلاد بزاااف امالا بديت نحوس على خطوات الهجرة ليها لانو مكان عندي حتى فكرة منين نبدا كنت خارج مجال التغطية ...امالا بديت نحوس عن طريق الانترنت و سقسيت ناس بزاااف و حوست في قروبات خاصة بالهجرة الى المانيا و بديت رحلة الجري و الكفاح ههههه....
حبيت نعفيكم من التفاصيل و العراقيل لي واجهتني خاصة في الادارات الجزائرية (راكم علابالكم) صرااااولي بزااااف عراقيل و عييييت و جرييييت بزاااااف باش لحقت لوين راني .. يعني لازم الصبر ثم الصبر ثم الصبر ...
اولا بديت باوراقي تع الجامعة بعد عنااااء طويييييل خرجت ڤع اوراقي من الجامعة لي هوما ( الديبلوم النهائي، كشوف النقاط تع النموذج الوزاري، ملحق الديبلوم النهائي، cetrificate of language proficieny يعني
شهادة انو دروسي لي تلقيتها في الليسانس كانت كلها باللغة الانجليزية ، و attestation de bonne conduite ) يعني مخليت والو في الجامعة الحاجة لي قدرت نجيبها جبتها اومبعد ديتهم نكاشيهم في الوزارات (وزارة التربية، وزارة التعليم العالي، وزارة الخارجية) و كي كملت المصادقة عليهم ديتهم للترجمة للالمانية عند الاستاذ يوسف عراب و في نفس الوقت حليت حساب بنكي و كنت نعمر فيه الاورو بلعقل كنت الدراهم لي يطيحو في يدي نشريهم اورو و نخبيه في البونكا و في نفس الوقت ايضا درت معادلة شهادتي في المانيا بعت الفوطوكوبي تع الديبلوم النهائي و كشوف النقاط و نسخة من الباسبور يعني بعتهم بالعربية نخلوهم اصليين منبعتهومش مترجمين و زدت عمرت واحد فوغميلاغ من موقع المكتب المركزي للتعليم الاجنبي المكتب المسؤول عن المعادلات الاجنبية في المانيا
Zentralstelle für ausländisches Bildungswesen" (Central Office for Foreign Education) (ZAB)
بعت ڤع هاد الوثائق عن طريق DHL استقامتلي مليون و شوية و لحقت في نهار لعندهم و تخلصهم 200 اورو و تسنى ثلث اشهر باش تلحقك المعادلة تاعك حتى للدار و في نفس الوقت ايضا دخلت نقرا اللغة الالمانية في مدرسة GOETHE تع حيدرة و لحقت نيفو B1 و كي عولت نجوز امتحان B1 مكاش الاماكن (راكو علابالكم كيفاش حكايتهم) سييت شحال من مرة نحجز مكان للامتحان مصحتليش .. امالا لاشيت لافار و رحت حضرت روحي لامتحان General ITELS و جبت فيه 6.5 B2 الحمد الله و في نفس الوقت حجزت موعد في VFS لانو سمعت بلي المواعيد طول باش تلحق امالا حجزت موعد و قعدت في لاليست داطونت قرابة 3 اشهر حتى عيطولي و قالولي ارواحي جوزي قتلهم منيش واجدة زيدولي وقت قاتلي معليش كي تكوني واجدة عاودي عيطيلنا صحا ... يعني حجزت موعد قبل ما نتحصل على القبول الجامعي... و في نفس الوقت بديت نكونطاكتي الجامعات الالمانية...
دخلت لموقع DAAD و بديت نخير الجامعات باش نكمل نقرا ماستر لغة انجليزية و شفت شحال من جامعة و دخلت قريت الشروط تاعهم و بديت نختار الجامعات لي ساعدوني الشروط تاعهم خاصة لي ميطلبوش امتحان اللغة الالمانية يعني انا اخترت جامعات لي برنامجها 100% انجليزي حتى اخترت واحد 10 جامعات و بديت راسل فيهم بالواحدة عن طريق الايمايل للتأكد من الشروط تاعهم لي قريتها في موقع DAAD قبل ما نبعتلهم رسميا
حتى في اخر المطاف بعت لثلاث جامعات و جاني قبول من عند واحدة منهم لي مطلبش اللغة الالمانية بتاتا كفاها فقط ليسانس تاعي بدون ايلتس ايضا الحمد الله و في نفس الوقت كملت عمرت الكونت بلوكي تاعي و بعت الدراهم للكونت FINTIBA لي كنت حليتو مور ما تحصلت على القبول الجامعي تفتحو اونلين ساهل في نهار يتفتح و في اسبوع لحقو الدراهم لالمانيا و جاني recu في الايمايل بلي لحقو... هاداك recu امبريميتو و حضرت قع الملف المطلوب لفيزا الدراسة الموجود على موقع السفارة و عاودت عيطت لل VFS و قتلهم بلي راني ديجا ديت موعد من قبل و دكا راني واجدة لدفع الملف و هوما كي يتأكدو بلي صح كنت في قائمة الانتظار مدولي موعد غدوة منداك دفعت ملفي قبلوه و بعد شهرين بالضبط عيطولي باش ندي الباسبور و نجيب لاسيرونس
و ديت الفيزا الحمد الله و دكا راني في المانيا و لعقوبة ليكم و ربي يسهللكم كاملين .
بالتوفيق لكم.